KECELEK*

Raine bingar

Lambene mesem

prasasat lintang sumunar

Enteng langkahe

Mantep atine

Lawange suwarga

Prasasat sejangkah ing ngarep mata

Bluar…..duar……

Emboh mau,endi sing kabukak menga

Lawang suwarga utawa lawang neraka

Sing jelas lobine hotel ajur

Regale greja mumur

Bathang pating gumlenthang

Kaya pindhang mateng kepanggang

Kafir utawa muslim,

Ora perduli priya utawa wanita

Sapa sing cedak

Mesthi kecandak

Bakal gumlethak

Ajur mumur kaya pudak

dipidak-pidak

Ana maneh kang lumangkah

Lakune gagah

Atine kabuncah rasa sumringah

Prasasat katiban ndaru

Mantep kaya tinampa wahyu

Kenceng tekate

Mancep imane

Paribasan suwarga arep kecawe

Gler…bler………

Embuh apa sing dirasa

Sing jelas,bangunan ajur sakkedeping netra

Ana café njleput

Ana bangunan mumut

Akeh manungsa pating jerit

Pada bluru dadi mayit

(sing sapa wonge mateni kafir mu’ahad

  dheweke tan bakal bisa mambu arume suwarga

  lan wangine suwarga wis bisa karasakake

  adohe lelaku patang puluh taun lawase**)

Apa…………………………………………………………?

Ambune wae ora?
Ampun Rabbi

Suwarga mung ono ngimpi

Sing kasil, among kapitunan ing saklumahing bumi

Sing jelas, among gawe sengsara sesami

Gawe kesruhing kahanan negari

Nikmat suwarga urusane Ilahi Rabbi

Sing genah,siksa kang nggegirisi ati

Wis ndaplang anggone ngenteni

____________________________________________________________________________

*Kecelek artine getun lan rumangsa kuciwa

**kapetik saking sabda Nabi shalallahualaihiwasallama

{Geguritan iki karakit dening Abu Qomar lan Abu Mas’ud,pengasuh ing sajroning SDI Darul Arqom Surabaya}